《煲過的電話粥，背過的電話號碼》
能對一個人的電話號碼做到倒背如流，除了是至親外，只有是熟悉的朋友才可以吧。我到現在還記得一些小學同學的的屋企電話號碼，因為小時候未有手機，要和同學吹水只好打屋企電話。而且可以「駁3 line」 係好勁既事，要幾個人傾是非同做project 就要揾人駁線。我仲好記得當有朋友掛住同第二個人「煲粥」而令你打唔到比佢，或者因為要轉線而令你係咁聽重重覆覆的《給愛麗絲》時，係幾咁忟！正正因為幾乎每日煲電話粥，他們的電話號碼基本上是已經刻在腦海中了。
到了中學有手機，但只有同台才能免費send SMS 的年代，朋友間煲電話粥依然是較普遍的事。而且通常為了慳手機電話費，用屋企電話傾到凌晨都唔奇。因此，就算開始用手機save contact，唔記電話，總有啲人既電話號碼係常在心中的。
再到後來慢慢開始有智能手機，有whatsapp，就變成根本連電話號碼都不用記，有咩就search contact 或者係whatsapp group 揾。方便是很方便，但一換左手機或唔見手機，fb 就會出現請人主動比番contact 的近況。有些本身好熟的人的電話號碼原來一唔見左，係點諗都諗唔返，原因係我地已習慣唔需要把毎一個數字都輸入好先打到電話。坦白講上到大學，大學的朋友絕少人知我屋企電話號碼，也應該很少人有去背我的手機號碼。
如果還有一些人的電話號碼（特別是屋企電話）是你用鍵盤打快過你開contact search 的話，這些不單單是很熟的朋友，應該還是陪你煲過不少電話粥的朋友吧。又或者有些人雖然不再熟悉，但他或她的電話號碼依然記得清清楚楚也不一定。只能說，現在的自己還記在腦海背得出的電話號碼，那個人一定是佔有很重要的位置，無論是過去式還是現在式。
先前媽媽拆了屋企電話，說已經沒什麼用，因為現在個個都有智能電話。於是我再沒有機會使用家用免提電話駁線，朋友們也再沒機會打我那個易記到不得了的屋企電話號碼。這也算是我青春流逝的又一證明。
Search